Ei kulturhistorisk reise med glimt i auge

Bli med til Finnøy, og ei heilt spesiell oppleving med tomatar, middelalderstemning og bedehushumor på jordnært vis. Her er mange bedehus, og eit aktivt bedehusmiljø. Men her er også ei rik historie og ein mangfaldig landsbruks– og handverkskultur!

Underhaldarane og omvisarane Arne Nordbø og Tor Øyvind Skeiseid tar deg med på ein tur du lever på i lange tider.
Rundt på Finnøy kan du få med deg omvising i Lauvsnes Gartneri, gongkaker med tomatsyltetøy og julestemning i middelalderkyrkja på Hesby. De kan også velja å ta eit eksotisk besøk i den pitte litle pinserørsla på Sion Bedehus eller ein handlestopp hjå Sølvsmeden på Finnøy.

Høgdepunktet er uansett bedehusrevyen på Bethel bedehus. Lunt, historisk og humoristisk. Mange gjestar opplever både latter, tårer og klump i halsen!
Karikering av bedehustypar, forteljingar og spenstige sitat kjem i ei herleg blanding. Alt i ein morosam, men verdig tone. Basar, song og tale set ein ekstra spiss på besøket. Og når applausen har lagt seg, er du velkomen opp på galleriet til det einaste bedehusmuseet i Ryfylke!

Gongkaker med tomatsyltetøy frå Vignes, middag og dessert på Utsyn Ungdomssenter høyrer også med ein slik dag. Heimelaga mat med stor H!
Opplegget tar frå 6-8 timar, og passar for grupper på 20 personar og oppover.

PS: Fram til 1. oktober 2025 er Hesby kyrkje stengt, grunna restaurering. Men fortvil ikkje: Me køyrer Vandring i bedehusland uansett. Me markerer historia på utsida på vår måte. I tillegg blir forteljingar strødd ut over på Bethel, på Utsyn og i bussen.